अहमदनगर – शिवसेना ठाकरे गटाने बनावट शपथपत्र दाखल केल्याचा आरोप झाल्याने त्याच्या तपासासाठी मुंबई पोलिसांच्या गुन्हे शाखेचे पथक नगर जिल्ह्यात दाखल झाले आहे. या पथकाने काल बुधवारी कोपरगाव येथे चौकशी केली.
याबाबत अनेक शिवसैनिकांची कसून चौकशी सुरू असल्याची प्रतिक्रिया पोलीस निरीक्षक मधुकर सानप यांनी दिली. केंद्रीय निवडणूक आयोगाने शिवसेनेच्या धनुष्यबाण चिन्हाबद्दल तात्पुरता निर्णय जाहीर केला आहे. पुढच्या महिन्यात अंधेरी पूर्व पोटनिवडणूक होणार आहे. या निवडणुकीच्या पार्श्वभूमीवर धनुष्यबाण गोठवण्यात आलं आहे. तसेच शिवसेना पक्षाचे नाव देखील दोन्ही गटाना पोटनिवडणुकीत वापरता येणार नाही.
शिंदे गटाकडून सात लाख तर ठाकरे गटाकडून अडीच लाख शपथपत्रे सादर करण्यात आले होते. यात महाराष्ट्रातील 4500 बनावट शपथपत्र आढळल्या प्रकरणी गुन्हे शाखेची टीम कोल्हापूर, अहमदनगर, नाशिक आणि पालघर सोबतच इतर ठिकाणी रवाना करण्यात आली आहे.
या प्रकरणात निर्मल नगर पोलीस ठाण्यात गुन्हा दाखल करण्यात आला असून मुंबई गुन्हे शाखेचे पथक कोपरगाव येथे दाखल झालेले असून याबाबत काल बुधवारी दिवसभर चौकशी केली. आज गुरुवारी उर्वरित शपथपत्रांची चौकशी करुन अहवाल मुंबई येथे देणार असल्याची माहिती विश्वसनीय सुत्रांकडून मिळाली आहे.
